SA JAGTER/HUNTER | AUGUSTUS 2022 | Deur KARLA JANSE VAN VUUREN | Foto’s: GERRIE JANSE VAN VUUREN

Kos 1.jpg

SPRINGBOKBOUD IN ROOIWYN

JY BENODIG:

(genoeg vir 6):

•1 groot ui, fyngekap 

• 2 groot wortels, in juliennerepies gesny 

• 1 selderystingel, in repe gesny 

• 15 ml fyngedrukte knoffel 

• 500 g piekeluitjies (sny middeldeur indien die uitjies baie groot is) 

• 250 g knopiesampioene, gesny 

• 100 g botter 

• 300 g streepspek 

• 2 kg springbokboud of vleis in blokkies van sowat 3 cm gesny 

• 1 hoenderaftrekselblokkie 

• 750 ml goeie rooiwyn 

• 4 roosmaryntakkies 

• 3 lourierblare 

• 30 ml roosmarynsout (sien resep hiernaas) 

• 75 ml soppoeier (sien resep hiernaas)

SO MAAK ’N MENS:

1. Voorverhit die oond tot 150 °C. Pak die groente onderin ’n groot, oondvaste kastrol met ’n digpassende deksel. 

2. Voorverhit ’n pan met die helfte van die botter daarin en braai die spek tot bruin. Skep uit en plaas saam met die groente in die bak.

3. Braai die springbokvleis in klein hoeveelhede in die res van die botter, skep telkens uit sodra bruin (los hierdie stap uit as jy ’n heel blad of boud gebruik).

4. Breek die aftrekselblokkie op in een koppie van die wyn en giet in die pan waar in die vleis (of net die spek) gebraai het. Kook vinnig op en giet dan oor die groente in die kastrol.

5. Pak die vleis bo-op die groente (of sit die heel boud of blad bo-op die groente) en plaas die roosmaryntakkies en lourierblare op die vleis. Geur dan met die roosmarynsout en giet die res van die wyn oor.

6. Maak die kastrol toe met foelie en sit die deksel op. Oondbak vir 6 uur tot sag. Giet of skep dan van die pansous uit en laat dit effens afkoel voor jy die soppoeier byroer. Gooi dit terug in die kastrol.

7. Verhoog die oondtemperatuur tot 180 °C en bak sonder die deksel vir 15 minute totdat die sous verdik het. Skep uit in ’n warm opdienbak en sit voor met stampmielies of gegeurde rys en groente van jou keuse. Ek het dit saam met polenta voorgesit, wat absoluut heerlik was as ’n pasmaat vir die geurige sous en sappige vleis.

 

VIR DIE ROOSMARYNSOUT:

(lewer 500 g)

• Kap 750 ml vars roosmarynblaartjies fyn met die hand of in jou voedselverwerker. Meng 500 ml mediumgrowwe sout by en plaas in ’n dehidreerder vir 6 uur by 60 °C of in die oond vir drie uur by 70 °C. Laat die sout afkoel en meng dan met 5 ml uiepoeier en 10 ml rysmeel. Bêre in lugdigte houers.

VIR DIE SOPPOEIER: 

(lewer 1 kg)

• Plaas 500 g volroommelkpoeier, 300 g koekmeel, 100 g mielieblom (Maizena), 500 g botter en 4 hoenderaftrekselblokkies in jou voedselverwerker en meng tot alles fyn en goed deurgemeng is. Plaas in ’n lugdigte houer en bewaar vir tot drie maande in die yskas of ses maande in die vrieskas.

(As jy by vandag se resep graag nog ’n bykos wil maak, beveel Annelien ’n spek-en-uietert aan. Daar is ’n gratis resep op haar webwerf: www.annelienpienaar. co.za)