SA JAGTER/HUNTER | Oktober-September 2023 | Deur KARLA JANSE VAN VUUREN | Foto’s: GERRIE JANSE VAN VUUREN

Gyros – ’n Griekse lekkerny met ’n Afrika-kinkel

 

Wanneer ek aan lande en hul kenmerkende geregte dink, is daar sekere dinge wat vir my hand aan hand gaan – pizza vir Italië, kerrie vir Indië, vis en tjips vir Brittanje, en gyro’s vir Griekeland. Dié gereg word tradisioneel gemaak van dun vleisskyfies wat afgesny word van vleis wat op ’n vertikale spit gaargemaak word. “Gyro” het dan ook sy wortels in die Grieks vir “spin” of “roteer”. Dit word soms ook “yiro” gespel omdat dít is hoe ’n mens dit uitspreek – “yeero”. ’n Griekse gyro is baie soos die Turkse döner kebab of die Midde-Oosterse shawarma, en kosgeskiedkundiges meen juis dié gereg het saam met vlugtelinge uit gebiede soos Istanboel en Izmir in Griekeland aangekom (aldus greekboston.com). Volgens ’n artikel in The New York Times, is die vleis wat gebruik word gewoonlik lam of bees, maar vark en hoender kan ook ingespan word. Dit is juis dié veelsydigheid wat my laat dink het ’n wildsvleis-gyro is nie ’n slegte idee nie! Die vleisskyfies of -repies word dan in ’n varsgemaakte, warm pita of platbrood toegevou en afgerond met daardie ander Griekse gunsteling, tzatziki, en gekapte tamaties, feta en uie. ’n Mens eet dit dan sommer so met die hand terwyl die souse tussen jou vingers afdrup. Dit is juis hoekom dit so gewild is as straatkos in Griekeland.

Gyro’s is vir my die perfekte kom-kuier-en-deel-gereg. Dit is ook ideaal om oor die naweek saam met vriende te eet terwyl almal buite ontspan en die lenteweer geniet. Moenie bekommerd wees dat jy nou ’n vertikale spit moet opstel om ’n tuisgemaakte gyro te geniet nie. Dit is ewe lekker met repies vleis wat jou slagter sommer vir jou kan sny. Ek het heerlike gemsbokrepies vir my gyro’s gebruik, wat ek net vir ’n minuut of twee in my riffelpan gebraai het. Die vleis bly ook heerlik sag omdat dit eers gemarineer word in ’n mengsel van jogurt, knoffel en asyn. Ek het die ander bestanddele in bakkies gesit, my tuisgebakte platbrode op ’n mooi houtbord geplaas, en my gaste genooi om elk hul eie gyro te bou. Wat is dan nou lekkerder as ’n Griekse lekkerny met ’n Afrika-kinkel om te sê “hallo lente”!