'n Mens hoor gereeld stories van jagters wat ingedoen voel deur die plaaseienaar omdat hulle met die aankoms op die plaas of wanneer die rekening vereffen moet word verras word deur verskuilde kostes. Daar is ook ruimte vir misverstande tussen jagter en boer oor aspekte soos trofeediere, watter dele van die karkas die jagter mag huistoe neem, betaling vir misskote en meer. Daarom beveel ons aan dat die jagter 'n lys vrae aan die boer stuur voordat hy sy jag bespreek en sodoende die ooreenkoms tussen homself en die boer op skrif kry en alle misverstande uitskakel.